الأربعاء، يناير ١٦، ٢٠١٣

 

قلبى الصُغَيَر

بعد الغُنا و الهَنا
أفراح حمام بيطير

ضحكى يهز السما
و شعور جميل و أثير

جرحين ورا جرحين
و جروح كمان و كتير

قلبى الصُغَيَر كبر
بقى جرح قاسى كبير

السبت، يناير ١٢، ٢٠١٣

 

يسعد صباحك

يا رب يجعلك صباح .... نادى و سعيد

كمثل ضحك الشمس .... لليوم الجديد

زى إنتصار النهار .... ع الليل الشديد

زى بسمة الدفا .... ف قلب الجليد

زى ضحكة المَلَك .... و مليون وليد

زى ما حُبك حَرَرُه .... قلبى العبيد

و زى أفراح البشر .... ف ألف عيد

و زى نجمة حبنا .... و نورها العنيد

صباح سعيد يا حبيبتى .... صباح سعيد

زى قلبك ما حَضنى .... بألف إيد

الخميس، يناير ٠٣، ٢٠١٣

 

القرار

==============================================


صرخت و قالت لازم أضحى ... و قلبى فداك ف النار

صَوَت و قال أنا رايح أبعد ... علشان يجيكى نهار

نزلت دموع البين شلال ... عملت بحيره م الأسى و أنهار

مات الكلام جوه العيون م الندم ... دَبح الهوى بألف سيف بتار

دار الزمن دورته نقطة حلاوه ... ف ألف بحر مرار

 لا فداها يحيى قلب الوله الغلبان ... ولا روحه قدرت تكمل المشوار

و لا بعده نور شمعتين عمرها ... و قلبها أهو فَرتكُه  الإعصار

ضحك شيطان البعد بقهقه ... خبير و عالم بالجبر و الإختيار

و هتف بصوت ما ينسمع ... يا جهلكوا يا إنس بالأسرار

الحب مش إختيار يا حماره

الحب مهواش قرار يا حمار

===========

محمد منيسى 

القاهرة 03-01-2013


This page is powered by Blogger. Isn't yours?