الأحد، مارس ١٧، ٢٠١٣
القوس و الكمان
===========
لما العيون إتفتحت ، و عمايا زال
كل السنين إتجمعوا ف لحظة كمال
كل المِخَبى ف الرُكام ظهر و بان
الشمس داست ع العَتام
حرقت حشود قلب الضلام
و النور فَرَش كل المكان
خلف الستاير كنتى إنتى
قريبه منى يا حبيبتى
قبل البدايات و الطوفان
جِبت الشريط من أوله
كل اللى فات و مِسَجِلُه
فيه اللى كاين و اللى كان
فيه الهوى صافى و جميل
فيه الشعور حُر و نبيل
فيه الغرام من غير هوان
فيه الجَمال اللى إمتلك
قلبى يا أجمل من مَلَك
يا أحلى من كُل الحِسَان
فيه العيون أصل الدفا
بحور وَسِيعَه م الوفا
و مايعرفوش غير الأمان
فيه الإيدين الناعميات
و اللمسه تحيى م الموات
تداوى من كل الحرمان
فيه الشفايف ألف لون
تدى هُدى و ساعات جنون
تسقى النعيم ألوان ألوان
فيه الغرام اللى إتبنى
يكفينى ١٠٠ ألف سنه
فوق التاريخ فوق الزمان
قلبى بيهوِى م الخطر
بردان و يرجف م المطر
وف حُضنِك الخير و الحنان
أنا الأعمى اللى كان مكفوف
و فَتَّح لما مات م الخوف
على حُرقة البين و الهجران
حُبِك يا رُوحى ده الحياه
يشفى الألم و يداوى آه
للفرح كان هو العنوان
بأحبك إنتى يا حياتى
يا كُل ماضى و كُل آتى
يا غنوه ماليه لى الأكوان
يا نجمه قلبى بيحضُنِك
و يدوب فداكى و يسعدك
لو هو قوس ... إنتى الكمان
============
محمد منيسى
١٧ مارس ٢٠١٣
١٧ مارس ٢٠١٣
الأربعاء، مارس ١٣، ٢٠١٣
القلب الكبير
قلبك ده كبير يا حبيبى
و الحب ف قلبى كبير
أيامه تعدى هوانا
زى غرام العصافير
و العش الوردى بيكبر
و الهم خلاص بيطير
لا غراب البين بينَوَح
ولا يقلب أحلى مصير
جناحاتك دى حافظانا
من ريح و تراب أمشير
قلبك حَوَط حوالينا
و حمانا من الأعاصير
دلوقتى الليل أهو جانا
كاسح مجنون شرير
لا بيرحم ولا بيسمى
لا بيسمع ولا بَصير
أنا روحى تفدى دموعك
و حياتى ما تبقى كتير
غلطان من ساسى لراسى
و لفضلك لسه أسير
إرحم قلبى الولهان
ما ترجعهوشى كسير
محمد منيسى
١٣ مارس ٢٠١٣
