الأربعاء، فبراير ٠٩، ٢٠١١
مكسوووووووف
ووشى مطاطى
و أنا مكسوووووف
الله يرحم يحسن ليكم
ياللى محيتوا وشوش الخوف
ياللى طفيتوا سواد الليل
بشمس تطوف
ياللى قابلتوا وجه كريم
ليحيا ألوف
ياللى غرستوا الفجر لبنتى
و نور مكشوف
ياللى حميتوا الفكرة لولدى
يبص يشوف
ياللى بدرتوا البسمه ﻷبويا
ملو كفوف
يا قلب الفكره وأمس و بكره
أنا مكسوووووووووف
الجمعة، فبراير ٠٤، ٢٠١١
يوميات واحد من جيل الوسط
سنة 2011
************
المدام/شاهى - بكره فيه ثورة
أنا- ههههه ما قالوش الساعه كام. يا بنتى هو فيه ثورة بتدى مواعيد
25 يناير
************
أنا - يا شاهى. إلحقى نوارة قاعده فى ميدان التحرير و قاعده بتهتف.
شاهى- فين
أنا - أهيه اللى لابسه حجاب أخضر
شاهى- ربنا يستر
26 يناير
************
واحد صاحبى - مبروك يا عم عملولك ثوره فى عيد ميلادك
أنا - يا عم إرحمنى عمرك سمعت عن ثورة لبرج الجردل برضه. على فكره دول باتوا إمبارح
*************
إبنى الكبير حوده - كل سنه و إنت طيب يا بابا. هو صحيح فيه ثوره
أنا - أيوه يا حبيبى
حوده - هيييه يا سلام
أنا - مبسوط قوى كده ليه
حوده - أصل كده هايكتبوا عننا فى كتاب الدراسات زى أحمد عرابى
أنا -!!!!
27 يناير
شاهى (بترقب و تحفز) - بيقولوا فيه تجمع كبير جدا بكره بعد الصلاة
أنا (ووشى فى اﻷرض) - ماشى
28 يناير
مافيش نت!!!!
مافيش موبايل!!!!!
ذهووووووووووووول تام
29 يناير
************
واحد صاحبى - البوليس خلع يا رجاله
أنا - كملت شنطة الهبل
*******
البواب - البلطجيه و الحراميه ماليين الدنيا
أنا - و إيه الجديد
البواب - يا بيه بيهجموا على المحلات و البيوت
*******
ضرب نار ملعلع و عربيات و صوات
أنا - أنا نازل
بنتى سوسو (حضنت رجلى و بتعيط بهيستريا) - ما تنزلش يا باباااااااا
أنا - ما تخافيش يا حبيبتى
*******
جارنا العراقى - تعودنا على ذلك يا أستاذ. كنا نكون دوريات حراسه بالسلاح فى العراق
أنا - إحنا مش عايزين نتعود يا حاج سنان
30 يناير
************
تليفونات لكل محافظات الجمهوريه للأهل و اﻷصحاب
كل جيلى مذهووووووول
كل الشباب متحمس مووووووووت
*************
حوده قاعد يغنى (الشعب يريد إسقاط النظام)
سوسو - يعنى إيه النظام يا بابا
أنا - يعنى الحكومه يا حبيبتى
سوسو - و إزاى تسقط يا بابا
أنا - يعنى تروح يا حبيبتى
سوسو - و مايبقاش فيه حكومه
أنا - تيجى واحده تانيه أحسن
سوسو - مين يجيبها
أنا - الرئيس
سوسو - يييه تانى
أنا - !!!!
31 يناير
************
حوده - حسنى مبارك ده رخم قوى يا بابا
أنا - ليه يا عم حوده
حوده - قفل النت ليه
أنا - و الله ما أنا عارف يا حوده
حوده - عشان رخم
************
قناة الجزيره قاعده تجرى و أنا بأجرى وراها
إيه الهبل ده
************
دعوة لمظاهره مليونيه
يا لهوى مليونيه
يا ولاد اﻹيه
***********
بنتى اﻷصغر لوكا الكوابيس مبهدلاها
1 فبراير
************
العيال مسروعين من الحراميه
صحيتهم بدرى و هجمنا على أمهم و هى نايمه
و صرخنا
- الشعب يريد تحضير الفطار
- إصحى يا مصر
***********
دول مش مليون
دول أكتر من مليون
و مش بس فى التحرير
فى كل مصر
الشعر اللى فاضل فى راسى وقف
**************
أنا - ربنا يستر
شاهى- خير
أنا - لما اﻹنترنت ترجع هانشوف بلاوى
شاهى - بيقولوا ستين واحد مات
أنا - اللى ماتوا مش أقل من خمسميه
شاهى - يا لهوى
*************
أصيله يا ماما
قاعده تعيط بعد خطاب الريس
ما سكتتش إلا لما قلتلها هابلغ مجلس قيادة الثورة عنها بس أول ما أعرف أساميهم
2 فبراير
************
كلااااااااااااااااااااااب
إيه الوطيان ده
حاسس إن إسمى نبويه
ولاد الكلب
***********
لوكا - يعنى إيه تمحى يا بابا
أنا - إيه
لوكا - تمحى. بيقولوا مبارك يتمحى
أنا - تنحى يا حبيبتى. مبارك يتنحى يعنى مبارك يمشى
لوكا - طيب ما يقولوا يمشى
أنا - صحيح !!!
***********
التلى فيسيون المصرى
بهايم برخصه
و اللى يتفرج عليهم
يا إما مريض نفسى بيحاول يعض ودانه
يا إنا معتقل فى جوانتانامو بيعذبوا أمه
3 فبراير
************
أنا - إسكتى مش جمعة الرحيل بكره
شاهى - يا راااجل
***********
أنا - شفت ياد جيلنا العظيم
أيمن (دفعتى) - بجد
أنا - بجد إيه يا أهبل. ده إحنا جيلنا ده لو إتشطب من الدنيا ما حدش هايحس بأى تغيير
أيمن - ليه يا عم الحاج؟
أنا - ولا لحقنا جيل الملك و اﻷحزاب. ولا لحقنا جيل الستينات و الثورة. ولا جيل السبعينات و الثقافه. و لا الجيل العفريت بتاع دلوقتى.
أيمن - أمال إحنا مالناش وصف.
أنا - إزاى ياد. إحنا جيل بخ . جتك نيله إنت و أنا و كل اللى عنده خمسه و أربعين سنه يا واطى.
أيمن - ملعون أبو شكلك.
أنا - بالظبط.
4 فبراير
صباح الخير على الورد اللى فتح فى جناين مصر
*************
الحمد لله كل أحلامى إتحققت
1) ولادى هايعيشوا فى دولة ديموقراطيه
2) ولاد الكلب الصهاينه مش هايقعدوا يعايروا فى اللى جابونا بالديموقراطيه الوحيده فى المنطقه
3) هاروح أنتخب لأول مره فى حياتى
4) التليفى فيسيون المصرى هايقلب حضانة أطفال
5) هأتابع جلسات مجلس الشعب
6) هأسمع خطابات الرئيس الجديد
7) إحتفالية الزمالك بالمئويه باظت
***************
بسبس بسبس بسبس بسبس
ما حدش شاف إكسلنت ناو ناو الشهير بممتاز القطه يا جدعان
أنا عامله فته على لبن حمار و حالف أطفحاله أول ما أشوفه
